Ögey ana (1958)

Kiçik İsmayıl kənddə hamının tanıdığı dəcəl uşaqdır. Bir gün atası Arif evə yeni həyat yoldaşını - həkim işləyən Dilarəni və onun İsmayılla yaşıd qızı Cəmiləni gətirir. İsmayıl ögey anasını görmək istəmir, Cəmiləni isə hər fürsətdə incidir.

Dilarə oğlanın qiymət dəftərçəsindəki ikiləri atasına göstərəndə İsmayılın acığı daha da artır: cəza olaraq atası onu dağdakı yol tikintisinə özü ilə aparmır. Cəmilə anasına şikayət edəndə İsmayıl qızın üstünə yarasa atır və ögey anadan cəza alır.

Dilarənin ağır xəstə bir adamın həyatını xilas etdiyini görəndə İsmayılın fikri yavaş-yavaş dəyişməyə başlayır. Amma çaydan keçərkən Cəmilə suya düşüb bərk xəstələnir və vicdan əzabı çəkən İsmayıl ona kömək üçün dağa, itburnu dalınca qaçır.