Bəxtiyar (1955)

Bəxtiyar Muradov uşaqlıqdan gözəl səsi ilə seçilir. Hələ kiçik ikən dostları ilə professor Rəcəbovun bağına alma dalınca girəndə professor onun səsini eşidir və oxumağı öyrənməyi məsləhət görür. Amma Bəxtiyar atasının yolunu seçib neftçi olur.

Bəxtiyarın uşaqlıq dostu və sevgilisi Saşa Moskvaya oxumağa gedir, onunla birlikdə Bəxtiyarın rəqibi, özündən razı Yusif də yola düşür. İncikliklə ayrılan gənclər bir neçə il bir-birindən uzaq qalır.

Bu vaxt klub müdiri Ağabala yoxlamadan canını qurtarmaq üçün Bəxtiyarı səhnəyə çıxarır və tezliklə onun səsindən pul qazanmağın yolunu tapır. Konsertlər, qastrollar, alqışlar başlayır, amma bu tələsik şöhrət Bəxtiyarın səsinə və həyatına baha başa gəlir.