Oyun divi Ubisoft-da nepotizm məsələsi

Ubisoft yenə oyunla yox, idarəetmə qərarı ilə gündəmə gəldi. Şirkətin CEO-su Yves Guillemot-un oğlu Charlie Guillemot yeni yaradılan, Tencent-in də iştirak etdiyi bölmədə rəhbər postlardan birinə gətirildikdən sonra “daydaylıq”, “qohumbazlıq”, bir sözlə nepotizm söhbəti böyüdü. Şirkət tərəfi isə bunu gizlətmədən “Ubisoft əvvəldən ailə şirkəti kimi qurulub” xətti ilə izah edir və təyinatın “bacarıq, təcrübə və uyğunluq” əsasında edildiyini deyir.

Bu mövzunu daha həssas edən detal odur ki, Charlie-nin rolu “sadəcə titul” deyil: o, Ubisoft-un əsas pul gətirən üç böyük brendinin, yəni Assassin’s Creed, Rainbow Six və Far Cry xəttinin “istiqamət, kontent və marketinq” tərəfinə cavabdeh göstərilir. Bu da icmanın gözündə sualı sərtləşdirir: “Şirkət ağır gün keçirərkən bu qədər kritik yük niyə ailənin içində qalır?”

Rəhbərlik isə eyni anda bazara başqa bir mesaj verir: “bizim hələ yol xəritəmiz var.” Müsahibələrdə CEO yeni Assassin’s Creed oyunlarının və iki Far Cry layihəsinin inkişafda olduğunu açıq şəkildə təsdiqləyib. Yəni bir tərəfdən nepotizm ittihamlarını söndürməyə çalışırlar, digər tərəfdən “böyük franşizalar yaşayır” deyib gündəmi oyunlara qaytarmaq istəyirlər.

Ubisoft-un son zamanlardakı çətin vəziyyəti

Ubisoft-un son dövr “batışa gedir” narrativi boş yerdən yaranmayıb. Son illərdə şirkətin üst-üstə düşən problemləri var: gecikən layihələr, dayandırılan oyunlar, yenidənqurma, işdən çıxarmalar və bazarın verdiyi soyuq reaksiya. Bu hadisələr ayrı-ayrı deyil, bir-birini qidalandıran zəncir kimidir.

Ən səs-küylü hissə, dayandırılan 6 layihə mövzusu oldu. Məlumatlara görə Ubisoft bir neçə layihəni tamamilə bağlayıb və bu siyahıda illərdir problemli gedişi ilə tanınan Prince of Persia: The Sands of Time Remake də var. Dayandırıldığı deyilən layihələr bunlardır:

Prince of Persia: The Sands of Time Remake
Project Aether
Project Pathfinder (əvvəl “Project U” kimi tanınıb)
Project Crest (WW2 extraction-shooter)
Assassin’s Creed Rebellion (dəstək dayandırılır)
Assassin’s Creed Singularity (mobil AC layihəsi)

Şirkət bu tip qərarları adətən “resursları daha vacib işlərə yönəltmək” kimi izah edir. Amma oyunçular üçün sevilən və gözlənilən layihələrin ləğv olunması xoşagəlməz haldır.

Bunun ardınca gələn ikinci böyük məsələ isə yenidənqurma və kadr məsələləridir. Ubisoft rəqabətdə qalmaq üçün strukturunu dəyişdirdiyini açıqlayıb. Bununla paralel olaraq, bəzi studiyaların bağlandığı və ümumi restrukturizasiya çərçivəsində işdən çıxarmaların başladığı da xəbərlərdə yer alıb.

Və təbii ki, bazar bu xəbərləri sevə-sevə qarşılamır. Böyük ləğv dalğası və yenidənqurma xəbərlərindən sonra şirkətin səhmlərinin kəskin düşdüyü, dəyərin xeyli azaldığı, hətta “uzun illərin ən aşağı səviyyələri”ndən danışıldığı qeyd olunur.

Bəs niyə bu nöqtəyə gəlib çıxdılar? Burada artıq tək “xəbər” yox, ümumi müşahidə də var: Ubisoft uzun müddət eyni tip formulaya güvənib, bəzi böyük layihələrdə xərclər şişib, istehsal müddətləri uzanıb. Bir neçə iş ard-arda gözləntiləri tam qarşılamayanda da həm oyunçu, həm investor tərəfdə etibar tez soyuyur. Bu gün Ubisoft-un problemi təkcə “yeni oyun çıxarmaq” deyil, həm də “biz hələ də ayaqdayıq” hissini insanlara inandırmaqdır.