Resident Evil Requiem sızıntıları: Oyunun hekayəsi internetə düşdü

Resident Evil Requiem haqqında yeni sızıntılar

Resident Evil Requiem hələ rəsmi çıxışına bir neçə gün qalmış internetə tam şəkildə düşüb və bu artıq “bir-iki detal sızdı” səviyyəsi deyil. Real gaming saytlarının yazdığına görə oyunun fiziki diskləri bəzi yerlərdə vaxtından əvvəl satılıb və nəticədə tam gameplay videoları, əsas hekayə xətti və hətta final səhnələri sosial mediaya yayılıb. Xüsusilə IGN və Eurogamer açıq şəkildə yazır ki, internetdə sonluğu göstərən videolar dolaşır və oyununa yiyə çıxa bilməyən Capcom bunları silmək üçün kütləvi şəkildə copyright şikayətləri göndərir. Şirkət oyunçulara müraciət edib ki, spoilər paylaşmayın, çünki bu, hələ oyunu oynamayanların bütün həvəsini öldürə bilər.

Bu məsələ sadəcə bir neçə screenshot deyil. Artıq oyunun neçə saatlıq olduğu, story-nin hansı istiqamətə getdiyi və bəzi əsas personajların aqibəti barədə konkret məlumatlar yayılıb. Yəni sızan şey demo deyil, demək olar tam oyundur. Problem ondadır ki, YouTube, TikTok və X-də yayılan videolar saniyələr içində reupload olunur. Birini silirlər, digəri yayımlanır. Bu miqyasda leak Resident Evil üçün son illərin ən böyük hadisələrindən sayılır və çıxışa az qalmış belə şeyin olması oyunun hype dalğasına da təsir edə bilər.

Resident Evil Requiem: nə gözləyirik, nə vaxt çıxır, hansı platformalara gəlir

Resident Evil Requiem 27 fevral 2026 tarixində çıxmalıdır və çoxları bunu artıq açıq şəkildə “RE9” kimi qəbul edir. Ən son əsas oyun olan Resident Evil Village-dan sonra bu hissə seriyanı növbəti mərhələyə daşımalıdır. Hazırkı məlumata görə oyun PlayStation 5, Xbox Series X/S və PC üçün gəlir, bəzi xəbərlərdə Nintendo Switch 2 versiyasının da adı keçir. Capcom artıq köhnə nəsli yavaş-yavaş arxa plana atır və fokus yeni konsollardadır.

Gameplay tərəfdə maraqlı məqam odur ki, Requiem iki fərqli vibe təqdim edir. Bir xətt daha klassik survival horror kimidir, az güllə, çox stress, inventory idarəsi və qaçış anları. Digər hissələr isə daha çox action yönümlüdür. Bu balans bizə Resident Evil 7: Biohazard ilə Village arasında qurulan keçidi xatırladır. Sızıntılara görə oyunda FPS və TPS kamera arasında seçim edə biləcəyik, yəni istəsən birinci şəxsdə tam immersiya, istəsən çiynin üstündən klassik RE tərzi oynamaq mümkün olacaq.

Gözlənti böyükdür, çünki Resident Evil son illərdə həm remake-lərlə, həm də əsas oyunlarla satışda ciddi nəticələr göstərib və fan bazasını yenidən alovlandırıb.

Requiem-in məqsədi sadəcə qorxutmaq deyil, həm də illərdir qurulan hekayə xəttini daha böyük miqyasda davam etdirməkdir. Bu dəfə diqqət çəkən ən böyük məqam isə Leon S. Kennedy-nin yenidən ön planda olmasıdır. Requiem-də Leonun daha təcrübəli, daha sərt və ağsaqqal tərzində görəcəyik. Bu da o deməkdir ki, oyun fan servis olaraq oyunçulara istədiyini verəcək, həm də Leonun hekayəsini yeni mərhələyə keçirəcək.

Digər tərəfdən oyunda yeni əsas obraz kimi Grace Ashcroft-un adı çəkilir. O, FBI analitiki kimi təqdim olunur və daha çox survival horror yönümlü hissələrdə oynanılır. Yəni Leon tərəfi daha çox action və ağır döyüşlər üzərində qurulursa, Grace hissələrində daha çox gərginlik, resurs qıtlığı və qaçış anları olacaq. Bu iki fərqli obrazın paralel irəliləməsi isə oyunun tempini dəyişən əsas faktor kimi göstərilir. Amma hazırda əsas mövzu gameplay mexanikaları yox, internetdə açıq-aşkar gəzən spoilərlərdir. Oyunu təmiz şəkildə oynamaq istəyənlər üçün ən yaxşı variant yaxın günlərdə sosial mediada Resident Evil ilə bağlı kontentdən bir az uzaq durmaqdır

Bu leakdən sonra Capcom-un işi daha çətin olacaq. Amma daha əvvəl gördüyümüz kimi, The Last of Us Part II-nin bütün hekayəsinin internetə sızması oyunun uğuruna maneə olmadı. Ümid edək ki, oyun pis çıxarsa, Capcom “oyunun sızdırılması insanlarda hype'ı öldürdü” deyə bəhanə etməz.